11 ივლისს თითქმის მთელი  მსოფლიო შოკოლადის საერთაშორისო დღეს აღნიშნავს. ამ საყოველთაოდ აღიარებულმა ნუგბარმა სრულიად დამსახურებულად მოიპოვა უფლება საკუთარი დღესასწაული ჰქონოდა. დღეს ხომ ის არამარტო პროდუქტად გვევლინება, რომელმაც მილიონობით ადამიანის გულები დაიპყრო, არამედ მთელი ხელოვნებაა, რომელიც დღითიდღე იხვეწება და ვითარდება.  

არაჩვეულებრივ გემოსა და არომატთან ერთად შოკოლადი უამრავ სასარგებლო  ნივთიერებას შეიცავს. ამიტომაცაა, რომ დადებითად მოქმედებს ადამიანების ჯანმრთელობასა და განწყობაზე.

ჩვენს დროში შოკოლადი ყველაზე მიღებულ საჩუქრად ითვლება. იშვიათად თუ ვინმე მიდის სტუმრად ლამაზად შეფუთული ნუგბარით ხელი რომ არ დაიმშვენოს.

შოკოლადის ისტორია შორეული მექსიკიდან მოდის, სადაც აცკეტელმა ინდიელებმა კაკაოს მარცვლებისაგან ეგრეთწოდებული „ღმერთების საკვების" მომზადება დაიწყეს. ევროპაში კი შოკოლადი ესპანელებმა შემოიტანეს XVI  საუკუნეში. მაშინ „შავ ოქროდ" აღიარებულ ამ პროდუქტს მხოლოდ სასმელის სახით მიირთმევდნენ და იყენებდნენ ენერგიის აღსადგენად, ფიზიკური ძალისა და ამტანობის გასაძლიერებლად.

თავად დღესასწაულს კი, რომელმაც დღეს მსოფლიო მოიცვა, ფრანგებს უნდა ვუმადლოდეთ, რადგან საფუძველი ამ დღესასწაულს სწორედ საფრენგეთში ჩაეყარა 1995 წელს. დღეს მსოფლიოს თითქმის ყველა ქვეყანაში ზარ-ზეიმით აღნიშნავენ ამ დღესასწაულს. ეწყობა ექსკურსიები, ფესტივალები, გამოფენები ყველაზე ცნობილი კულინარებისაგან შექმნილი შოკოლადების საუკეთესო შედევრებისა სადაც უამრავ კულინარიულ სიურპრიზს სთავაზობენ მნახველს. ამზადებენ შოკოლადის ფანტანებს, ქანდაკებებს... იმართება ფართომასშტაბიანი ბაზრობები სხვადასხვა ქვეყანაში მომზადებული ნუგბარის შესაძენად და დასაგემოვნებლად. ბელგიაში შოკოლადის მუზეუმიც არსებობს. სპეციალურ რესტორნებში შოკოლადის მენიუსაც სთავაზობენ სტუმრებს. შვეიცარიაში  „შოკოლადის მატარებლით" შეგიძლიათ გაისეირნოთ, მატარებლით, რომლით მგზავრობისას გაეცნობით შვეიცარიის ელიტარული შოკოლადის ისტორიას. ამერიკელებს კი შოკოლადი ისე უყვართ, ამ დღესასწაულს წელიწადში ორჯერ მართავენ.

თქვენც შეუერთდით ამ ლამაზ დღესასწაულს - მოუწყვეთ  საკუთარ თავსა და ახლობლებს ლამაზი დღე - მიირთვით უგემრიელესი შოკოლადი და დატკბით ცხოვრებით!

პერლა გისურვებთ ამაღლებულ განწყობას!  

ავტორი: ემილი