როგორც იქნა დადგა გაზაფხული, როდესაც ბუნება თვითონ გვეხმარება გახდომაში. წლიური ბიორიტმი ადამიანისა ასეა მოწყობილი: ჭარბი წონისაგან ყველაზე ადვილად სწორედ გაზაფხულობით ვთავისუფლდებით. და კიდევ, ახლად ამოსული თოთო მწვანილები და ბოსტნეული ძალიან სასარგებლო და იმდენად დაბალკალორიულია, რომ მათი ჭამა შეიძლება რაოდენობის შეუზღუდავად. ორგანიზმი ბევრ ენერგიას ხარჯავს მწვანილებისა და ბოსტნეულის მოსანელებლად. კალურიულობა კი ძალიან მცირეა ამ საკვებში. მაგალითად, 100 გრ კიტში - 15 კკალ., პომიდორში -20, ბოლოკში - 16, სალათაში - 11 და ა.შ.

გარდა ამისა, მცენარეული საკვები ძალიან სასარგებლოა ჩვენი ორგანიზმისათვის.
მაგალითად, წითელი ფერის საადრეო ხილი და ბოსტნეული შეიცავს კიბოს საწინააღმდეგო ნივთიერებებს, აქტიურად აფერხებენ დაბერების პროცესს, მდიდარია ვიტამინებით და მიკროელემენტებით.

ნიახური მდიდარია A, C, E ვიტამინებით, მინერალური ნივთიერებებით, ცილოვანი და ბოჭკოვანი ნივთიერებებით. დადებითად მოქმედებენ ნერვულ სისტემაზე და ნივთიერებათა ცვლაზე.

ხახვი - B1, B2, PP ვიტამინები, ასკორბინის მჟავა, კაროტინი. რეკომენდებულია დიაბეტის, ავიტამინოზის, ჰიპერტონიისა და ათეროსკლეროზის დროს.

კიტრი - A, C, B1, B2, PP, U ვიტამინები, მინერალური მარილები, ხელს უწყობს გულის, თირკმელების, ღვიძლის მოქმედებას.

კომბოსტო - C, P, B1, B2, PP, U ვიტამინები, კალიუმის მარილი. ამაგრებს სისხლძარღვებს, ხელს უწყობს მონელებას, ხელს უშლის წყლულის წარმოქმნას.

პომიდორი - C, B1, B2, P, K ვიტამინები, კაროტინი, ფოსფორი, კალიუმი. გამოიყენება ანემიის, გულსისხლძარღვთა დაავადების, გასტრიტის დროს.

კარგი იქნება, თუ წელიწადის ამ დროს საგაზაფხულო სალათების დიეტაზე გადახვალთ. ეს დიეტა იმითაცაა კარგი, რომ სწრაფად მზადდება, ძირითადად უმად, ცოცხლად. ეს აუცილებელია ზამთრის შემდეგ ჩვენი გამოფიტული ორგანიზმისათვის.

საგაზაფხულო დიეტა:
1. შეიძლება მიიღოთ შეუზღუდავად მინერალური ან ჩვეულებრივი წყალი.
2. დილით მიირთვით უშაქრო ყავა, ან მწვანე ჩაი ორცხობილასთან ან ერთ ნატეხ შოკოლადთან ერთად.
3. შუადღისით - საგაზაფხულო სალათა.
4. საღამოს 1 ჩ/ჭ რძე.

ახლა კი შემოგთავაზებთ საგაზაფხულო სალათების რამდენიმე ვარიანტს, რომ თქვენი რამდენიმედღიანი მენიუ მრავალფეროვანი და ვიტამინებით გაჯერებული გამოვიდეს.

საგაზაფხულო სალათების რეცეპტები:

• დავჭრათ ნიახური, სალათის ფოთლები, 1 კიტრი, 1 ვაშლი, 1 ტკბილი წიწაკა, 1 პომიდორი. მოვასხათ ლიმონის წვენი, 1 ს/კ ზეთი ან მაიონეზი, ძმარი, და მარილი გემოვნებით.

• 2 საშუალო კიტრი გავხეხოთ მსხვილ სახეხზე, დავამატოთ წვრილად დაჭრილი ტარხუნა, 1 ს/კ მაიონეზი, ან დაბალკალორიული არაჟანი და მარილი გემოვნებით.

• სალათის ფოთლები დავჭრათ, მოხარშული ქათმის ხორცი 150გრ, ზეთისხილი, წვრილად დაჭრილი კამა. მოვასხათ ლიმონის წვენი და მარილი გემოვნებით.

• 1 კოლოფ უცხიმო ხაჭოს შევურიოთ 2 სუფრის კოვზი რძე (შეიძლება მაწონი ან იოგურტი), დავამატოთ წვრილად დაჭრილი ოხრახუში, კამა, ქინძი, ნიორი, და მარილი გემოვნებით, მიღებული მასა შეიძლება წაუსვათ თხელი პურის ნაჭერზე და მიირთვათ ბუტერბროდის სახით პომიდვრის წვენთან ერთად.

• 2-3 ს/კ ჰერკულესის ფაფას დავამატოთ დაჭრილი პომიდორი, კიტრი, მწვანილი, მარილი.

• დავჭრათ უცხიმო, უმარილო ყველი პატარა ნაჭრებად, წვრილად დავჭრათ კამა, ოხრახუში, რეჰანი და პომიდორი. კარგად ავურიოთ, მოვასხათ ლიმონის წვენი, შეიძლება დავამატოთ ზეთისხილიც.

• დავჭრათ ყვავილოვანი კომბოსტო, პომიდორი, წვრილად დაჭრილი ოხრახუში და კამა, დავამატოთ დაბალკალორიული არაჟანი და მარილი.

• 1 კიტრი, 1 კვერცხი (მოხარშული), მწვანე ხახვი. ყველაფერი დავჭრათ, დავამატოთ 1 კოვზი ზეთი და მარილი გემოვნებით.

• მოხარშეთ 1 კარტოფილი, გაფცქვენით და დაჭერით პატარა ნაჭრებად, მოასხით 1 ს/კოვზი ზეთი, დაჭერით წვრილად მწვანე ხახვი და კიტრი, შეიძლება დაამატოთ 1 ვაშლი პიკანტური გემოსათვის, დაუმატეთ მარილი, პილპილი, დაბალკალორიული არაჟანი. ყველაფერი აურიეთ და მიირთვით.

• ავურიოთ წვრილად დაჭრილი მწვანილი (კამა, ოხრახუში, ქინძი, ნიახური, პრასი) დაბალკალორიულ არაჟანი და მარილი. ეს გარნირი შეგვიძლია ორთქლზე მოხარშულ თევზთან ერთად მიირთვათ.

ასეთი დიეტით შეიძლება საკმაოდ დიდი ხნის განმავლობაში გაძლოთ. მთავარი ის არის, რომ შიმშილის გრძნობა არ შეგაწუხებთ. შედეგს კი მიიღებთ რამდენიმე კვირაში. დაიკლებთ 4-6 კგ-ს, გაგისუფთავდებათ და გაგილამაზდებათ კანი, და თვალებში სხივი ჩაგიდგებათ. გვერწმუნეთ,რაც უფრო მეტხანს გაძლებთ ამ დიეტაზე, მით უფრო მეტ კილოგრამებს დაიკლებთ და თქვენი ანარეკლი სარკიდან დიდ მადლობას გეტყვით! პერლა გისურვებთ ჯანმრთელობას და სილამაზეს!

ავტორი: ემილი.