2013 წელი დგება და ყველამ ვიცით, რომ შავი წყლის გველი ცვლის შავ წყლის დრაკონს. ეს კი იმას ნიშნავს, რომ დამდეგ წელს შენარჩუნდება ის ძირეული ტენდენციები მოდის სფეროში რაც იყო შარშან. წელს აქტუალური იქნება  შავი, თეთრი, ვერცხლისფერი, ლურჯი, ცისფერი, მწვანე და ყველა ის ფერი, რომელიც წყალთან ასოცირდება.

საღამოს კაბები

გველს ისევე როგორც სხვა სიმბოლოებს, თავისი მახასიათებლები გააჩნია. ამიტომ სამოსი მის ხასიათს უნდა ატარებდეს. ეს კი იმას ნიშნავს, რომ კაბები უნდა იყოს მკაცრი სტილის, ტანზე მომდგარი, რათა მოძრაობები გამოკვეთილი იყოს. არ უნდა იყოს ზედმეტი დეტალები, ამასთანავე კაბა საინტერესო უნდა იყოს და არა მოსაწყენი. ამისათვის მას დაამატეთ შესაფერისი აქსესუარი, ჰარმონიული ჩანთა და ფეხსაცმელი. მაგრამ არ დაივიწყოთ, რომ ყველა დეტალი საგულდაგულოდ უნდა იყოს მოფიქრებული, შერჩეული და ერთმანეთს შერწყმული.

რაც შეეხება სტილს, ის ხაზს უნდა უსვამდეს თქვენი ფიგურის სილამაზეს. სამოსი სხეულზე უნდა იყოს შემოტმასნილი. სასურველია მაქსიმალურად გრძელი კაბები ან ქვედაბოლოები.

თუ თქვენი სხეული არაა იდეალური, არ არის აუცილებელი ვიწრო კაბაში გაიჭედოთ. შეარჩიეთ კაბა თქვენი ფიგურის შესაფერისად, სხეულის ნაკლი მის ნაკეცებსა და ნაკერებში დამალეთ  და დაიმახსოვრეთ, რომ მთავარია მოხდენილად გეცვათ და თავს კომფორტულად გრძნობდეთ.

მასალა

ქსოვილები, რითაც სამოსი იქნება შეკერილი, გველს უნდა მოგვაგონებდეს თავის შეფერილობითა და ელვარებით. წლის ფავორიტებად ითვლება ატლასის, აბრეშუმის, ბრჭყვიალა და მოელვარე ქსოვილების კაბები.  ასევე პოპულარობით ისარგებლებს ტყავის მასალა. არ არის აუცილებელი კაბა მთლიანად ტყავისაგან იყოს შეკერილი, საკმარისია ცალკეული ელემენტები ჰქონდეს ამ მასალით გაფორმებული. მოერიდეთ ნატურალური გველის ტყავის გამოყენებას. ამით წლის დედოფლის განრისხებას გამოიწვევთ, რაც 2013 წელს კარგს არაფერს გიქადით. შეეცადეთ ბრძენ გველს თავი მოაწონოთ და წარმატებები გაიზიაროთ ამ წელს კარიერასა თუ პირად ცხოვრებაში.

აქსესუარები

გირჩევთ აქსესუარების არჩევანის დროსაც შეინარჩუნოთ მკაცრი და ელეგანტური სტილი. უპირატეობა მიანიჭეთ ძვირფას ლითონებს. თეთრი ოქრო და ვერცხლი ყველაზე მეტად აქტუალური იქნება 2013 წელს. ფერად-ფერადი მოელვარე ქვებისგან თავი შეიკავეთ, რომ გველის ბრწყინვალება არ დაჩრდილოთ. აი, მარგალიტები კი (განსაკუთრებით შავი ფერის) ყველაზე მეტად მოსწონს გველს. ის ერთ-ერთი სტიქიაა წყლის გველისა. თუ მარგალიტები თქვენს სამოსს უხდება, თამამად მოირგეთ ისინი.

არ დაივიწყოთ, რომ ადამიანს ყველა სამოსზე მეტად ამაღლებული განწყობა ამშვენებს. გახალისდით, დაივიწყეთ ყოველდღიური საფიქრალი, სიხარულითა და იმედებით აღიჭურვეთ და დარწმუნებული იყავით, რომ თქვენთვის ეს წელი ნამდვილად წარმატების მომტაანი იქნება!