საზამთროს მურაბის მოსამზადებლად დაგჭირდებათ:

საზამთროს ქერქი (გათლილი და დაჭრილი) - 3 კგ.

შაქარი - 3 კგ.

კირში გამოყვანილი საზამთროს მურაბა საკმაოდ შრომატევადი მოსამზადებელია და დიდ დროსა და ენერგიას მოითხოვს. ამიტომ შემოგთავაზებთ მარტივ რეცეპტს იმ დიასახლისებისთვის, რომლებსაც სამზარეულოში საფუსფუსოდ ბევრი დრო არა აქვთ. 

ამისათვის უნდა შეაგროვოთ საზამთროს ქერქები, შემდეგ გათალოთ ისინი (მოაცილოთ მწვანე ფერის გარსი), დაჭრათ პატარა ზომის ნაჭრებად, აწონოთ (რომ იმდენივე შაქარი დააყაროთ, რამდენსაც საზამთრო იწონის), მოათავსოთ მურაბის მოსახარშ ქვაბში, დააყაროთ შაქარი, დაახუროთ ქვაბს სახურავი და დატოვოთ 6-8 საათის განმავლობაში (უმჯობესია ეს ღამით გააკეთოთ და დილით მოსახარშად გამზადებული დაგხვდებათ).

როცა შაქარდაყრილი საზამთროს ქერქები წვენს გამოუშვებს, დადგით ის გაზქურაზე, დრო და დრო ამოურიეთ, რომ ძირში დალექილი შაქარი გადნეს და რაც შეიძლება დაბალ ცეცხლზე წამოადუღეთ.

ადუღებისთანავე ქაფქირით ამოაწყვეთ მდუღარე წვენიდან დაჭრილი საზამთროს ქერქები და ჯამზე მოათავსეთ. დარჩენილი სიროფი კი დაახლოებით 1 საათის განმავლობაში ადუღეთ დაბალ ცეცხლზე. შემდეგ უკანვე ჩაყარეთ დაჭრილი საზამთროს ქერქები და ადუღეთ კიდევ ნახევარი საათის განმავლობაში.

გამზადებული მურაბა მდუღარე ჩაასხით სამურაბე ქილებში და მოხუფეთ ზამთრისათვის.

პს. თუ ამ მურაბას საწურზე გადაწურავთ, მთლიანად გააცლით სიროფს, რაც დარჩება ლანგარზე გაშლით და გააშრობთ, მიიღებთ ცუკატებს  - დაშაქრულ საზამთროს ჩირს, რომელიც ასევე უგემრიელესი ნუგბარია. 

ავტორი: ემილი (ეკა მათიაშვილის რეცეპტებიდან)

2015-08-14.