ახალი წელი რომ მალე მოვა, უკვე გითხარით, თუმცა უჩემოდაც კარგად იცოდით. ახალ წელს, საცივის გარეშე ვერ შევხვდებით, ალბათ არც ამის შეხსენება დაგჭირდებათ. დიდი სიამოვნებით ვასრულებთ ჩვენი საყვარელი მკითხველის თხოვნას და საცივის რეცეპტს შემოგთავაზებთ.
საცივის მომზადება არც თუ ისე რთულია, როგორც ბევრს ჰგონია. ერთი მსუქანი ინდაური, ნიგოზი, მარჯვე ხელები და რამდენიმე ოქროს წესი. აქვე ოქროს რჩევა პერლასაგან: საახალწლოდ არ დაკლათ ის ინდაური, ობამამ რომ შეიწყალა მადლიერების დღეს და არ გაგვხვიოთ სრულიად ერი დიპლომატიურ სკანდალში.

მაშ ასე, თქვენს წინაშეა ყველაზე გემრიელი საცივის რეცეპტი.

მასალა:

1 ცალი დედალი ინდაური).
1 კგ. თეთრი ნიგოზი
0,4კგ ხახვი
1 ს/კ ძმარი
საცივის სუნელი, ნიორი, მარილი, წიწაკა გემოვნებით

მომზადების წესი:

მოვხარშოთ ინდაური, ადუღების შემდეგ რამდენჯერმე გავასუფთაოთ ქაფისგან, რომ ინდაური სუფთად მოიხარშოს. როცა მოხარშვას ცოტა დააკლდება, ამოვიღოთ. გაგრილების მერე დავჭრათ სასურველი ზომის ნაჭრებად და შევწვათ.

ამასობაში, გაგრილებულ ნახარშს მოვართვათ ცხიმი და მასში მოვთუშოთ ძალიან წვრილად დაჭრილი, ან გატარებული ხახვი. (არ უნდა დაიწვას). გატარებული ნიგოზი, სუნელები (საცივის სუნელი იკითხეთ მესუნელესთან და თავად გაკიკეთებთ შესაბამის ნარევს), ყვითელი ყვავილი, გატარებული ნიორი და ძმარი ავურიოთ ერთმანეთში. დავაყაროთ მოთუშული ხახვი, კარგად ავურიოთ და დავასხათ ინდაურის ნახარში. დავამატოთ მარილი და წიწაკა გემოვნებით.

მთელი ეს მასა, უნდა გავატაროთ მარლაში ან საცერში. რაც დარჩება საცერზე გადავყაროთ. მიღებული სუფთა წვენი დავდგათ ცეცხლზე და ავადუღოთ.
გადმოვიღოთ და როცა შეგრილდება, დავასხათ წინასწარ დაჭრილ ინდაურის ნაჭრებს და საცივიც მზადაა.

გისურვებთ ბედნიერ შობა ახალ წელს!