,,ქალს ბედნიერებისათვის 3 რამ სჭირდება, კომპლიმენტი, სიყვარული და იმის ცოდნა, რომ ცოტათი ეჭვიანობთ,, ასე თვლიდა ერთი ფრანგი ფსიქოლოგი პიერ ლამბერტი.

კომპლიმენტს ჯადოსნური ძალა აქვს. იგი ქალს არა მხოლოდ ახარებს, ალამაზებს კიდეც. როდესაც ქალი თავდაჯერებულად და ლაღად გრძნობს თავს, ეს თქვენს მიმართ დამოკიდებულებაშიც ჩანს. ასე რომ, არ დაიშუროთ კომპლიმენტი და გაილამაზეთ ურთიერთობა. გახსოვდეთ, კომპლიმენტი ყველაზე ცივ გულსაც გი გაალღობს.

კომპლიმენტი და წახალისება, ყველასათვის სასიამოვნოა. თუმცა ქალები განსაკუთრებით ავლენენ მის საჭიროებას. ყურადღება ყველას მოსწონს, მაგრამ კაცები არასოდეს ჭირვეულობენ იმის გამო, რომ კომპლიმენტის თქმა დაგავიწყდათ, თითქოს ეს მათთვის არცაა..

კომპლიმენტი ერთადერთი წამალია, რომელიც მომენტალურად კურნავს ქალის უხასიათობას და მოწყენილობას. თანაც ისე, რომ უკუჩვენებები არ ახასიათებს.

რაც უფრო ღრმა შინაარს ატარებს იგი, მით უფრო საფუძვლიანად მოქმედებს ქალის ფსიქოლოგიაზე და მით უფრო შორია მოწყენილობა.

გარდა გარეგნული მომხიბვლელობის აღნიშვნისა, ქალისთვის სასიამოვნოა, როცა მის რომელიმე დადებით თვისებას უსვამთ ხაზს. ,,როგორ მომწონს, რომ ყოველთვის თავაზიანად ესაუბრები ხალხს,,. ,,მაოცებს შენი სერიოზული დამოკიდებულება საქმის მიმართ,, ,,შენ ყოველთვის გულთან მიგაქვს ჩემი საქმე..,,

მან ისედაც იცის, რომ მოგწონთ, მაგრამ თუ ამას თქვენგან მოისმენს, ბედნიერი იქნება.

ხშირად მამაკაცი სულაც არ იშურებს კომპლიმენტს, უბრალოდ თავს ვერ აბამს სათქმელს. არ ეხერხება იმის გადმოცემა, რასაც ხედავს და გრძნობს. ამიტომ, რამდენიმე რჩევა მივცეთ მათ, იქნებ რჩევები შემდეგ ჩვენივე სასიკეთოთ გამოიყენონ.

ყველა ქალს მიაჩნია, რომ არის მასში რაღაც განსაკუთრებული. ამის აღმოსაჩენად, დაკვირვებაა საჭირო. თუ მაგალითად, ქალს თავისი ცისფერი თვალები მოსწონს და ეამაყება, აუციებლად გაუსვამს ამას ხაზს, მიგახვედრებთ რომ ასეა. თქვენც არ დატოვოთ რეაგირების გარეშე და კომპლიმენტი არ დაიშუროთ.

არ გამოგეპაროთ არცერთი ცვლილება. ახალი ვარცხნილობა, ახალი კაბა ან ჩანთა. აუცილებლად შენიშნეთ და შეუქეთ. ამ შემთხვევაში ქალი ჩათვლის, რომ ფინანსები და დრო ტყუილად არ დაუხარჯავს და ეს ყველაფერი კომპლიმენტად ღირდა. თუ ცვლილებას უყურადღებოდ დატოვებთ, ამით ქალს ნამდვილად აწყენინებთ.

კომპლიმენტის ჯადოსნური ძალით, ქალი დაუძლეველ კომპლექსებსაც ივიწყებს. ამაში კი თქვენი დახმარებაა საჭირო. თუ მაგალითად, ქალი თავის განიერ თეძოებს ვერ იტანს, დელიკატურად მიანიშნეთ, რომ მშვენიერი ფეხები აქვს და განიერი თეძოები, უხდება კიდეც..
თუ ამას გულწრფელად ეტყვით, ქალი უფრო თავდაჯერებულად იგრძნობს თავს და კომპლექსებსაც დაივიწყებს. მაგრამ თუ უმცირეს ირონიას ან უყურადღებობას შეგნიშნავთ, ალიყური გარანტირებული გაქვთ.

მოერიდეთ ბანალურ და გაზეპირებულ კომპლიმენტებს. შეეცადეთ იყოთ ორიგინალური. ყველა ასხამს ხოტბას ლამაზ თვალებს, ტუჩებს.. ნაკლებად ახსენდებათ მშვენიერი კისერი, ან სულაც თითები..

ქალი ძალიან ბევრს ითხოვს ბედნიერებისათვის, მაგრამ რეალურად, უმცირესი ჭირდება იმისათვის, რომ თავი ბედნიერედ იგრძნოს. ეს უმცირესი თქვენი კომპლიმენტი შეიძლება აღმოჩნდეს. ამიტომ ნუ დაიშურებთ მას და შედეგიც არ დააყოვნებს.