პერლა იწყებს მოდის ტენდენციების მიმოხილვას 20-იანი წლებიდან თანამედროვეობამდე. მაშ ასე, დღეისათვის გთავაზობთ 20_იანი წლების მოდის ტენდენციების მიმოხილვას.

პირველი მსოფლიო ომის შემდეგ, თანდათან დაიწყო ემანსიპაციის პროცესი. შესამჩნევი გახდა ქალების აქტიურობა. ამან გამოვლინება ჩაცმულობაშიაც ჰპოვა. ამ პერიოდში ბევრი ქალი დაქვრივდა. შესაბამისად, ბევრი მათგანი იძულებული გახდა მუშაობა დაეწყო. მალე გაჩნდა მოხერხებული ტანსაცმლის მოთხოვნა.

სპორტი და გართობის სხვა საშუალებები უფრო დემოკრატიული და ქალებისთვის ხელმისაწვდომი გახდა. შესაბამისად სპეციალური ტანსაცმელი ქალებისთვისაც იკერებოდა.

20-იანი წლების მოდას, ყველაზე კარგად გამოხატავდა სიტყვა_ მოდერნიზება. მოდის სპეციალისტები მიიჩნევენ, რომ მოდას სწორედ 20-იან წლებში შეესხა ხორცი და მას შემდეგ მხოლოდ მისი განახლება ხდება.

20- იან წლებს დიზაინერებისთვის ოქროს ხანად მიიჩნევენ. ამ დროს ყოველი მესამე ფრანგი ქალი დიზაინერთან იმოსებოდა. ,,მოდის სახლები,, შემოსავლიან საწარმოებად იქცნენ. ამ სფეროში მხოლოდ საფრანგეთში 5 000 000 ადამიანი იყო დასაქმებული.

შედარებით შეძლებული ფენა იმოსებოდა ისეთ დიზაინერებთან, როგორებიც იყვნენ
Jean Patou, Rochas, Lanvin, Maison Doucet, Chanel. ისინი მოდის ფუძემდებლებად ითვლებოდნენ, მოდური ჟურნალების გარეკანზე ხვდებოდნენ. მდიდარი ქალები ერთმანეთს ეჯიბრებოდნენ მათთან შესამოსად.

20-იანი წლების ქალის სილუეტი, საგრძნობლად დაიხვეწა. უფრო თხელი და მოხდენილი გახდა. მოდური გახდა რუჯიანი კანიც.

ქალებმა მოკლე, ბიჭური ვარცხნილობა მოიხდინეს და პატარა, ზარის ფორმის ქუდებიც მოირგეს. ტიპური გახდა, ბიჭის სტილით ჩაცმული გოგონები (la garconne).
მოდაში შემოვიდა პერანგის ტიპის კაბები. ცოცხალი ფერები..

პირველად ისტორიაში, სწორედ 20_იან წლებში გამოაჩინეს ქალებმა წვივები. კაბისა და ქვედაბოლოს სიგრძე, მუხლამდე აიწია. კაბის დამოკლების ტენდენცია, ათწლეულის მეორე ნახევრამდე გაგრძელდა. ამის შემდეგ კი ისევ წამოვიდა კაბის დაგრძელების ტენდენცია.

20 იან წლების პირმშოა თეძოსთან გადაჭრილი კაბები. ამ დროს კორსეტები და არაკომფორტული ტანსაცმელი, ჰაეროვანმა და თავისუფალმა ქსოვილმა ჩაანაცვლა.

გამოჩნდა პირველი შარვალი ქალებისათვის. მოდური იყო ყველაფერი რაც ბრწყინავდა. მარგალიტები, პრიალა ფირფიტები, ფერადი ქვები..

1926 წელს, კოკო შანელმა შექმნა ლეგენდალური ,,პატარა შავი კაბა,,. მიუხედავად იმისა, რომ შავი ფერი დაკრძალვებისთვის იყო განკუთვნილი, ,,პატარა შავი კაბა,, 20- იანი წლების კლასიკად იქცა. იგი დღემდე საპატიო ადგილს იკავებს ქალის გარდერობში.

20 იანი წლების ბოლოს, ეკონომიკური კრიზისი დაემთხვა. სწორედ ამ დროს, კარგ ტონად ითვლებოდა, არც ისე თვალში საცემი, მაგრამ ელეგანტური ჩაცმულობა და შანელის ,,პატარა შავი კაბა,, ნამდვილ ჰიტად იქცა.