მასალა:

საქონლის ხორცი (რბილი) - 500 გრ.

ხახვი (მოზრდილი) - 4-5 თავი,

კვერცხი - 4 ცალი,

ზეთი - 1 ჩ/ჭ,

ფქვილი - 2 ჩ/ჭ,

მარილი, შავი პილპილი - გემოვნებით.

ფარშის მომზადება:

მოვათავსოთ ხორცი ქვაბში, დავფაროთ წყლით და მოვხარშოთ. გავაცივოთ და გავატაროთ ხორცსაკეპ მანქანაში ხახვთან ერთად. მოზრდილ ტაფაზე, დავასხათ ცოტაოდენი ზეთი და მოვშუშოთ გატარებული ფარში, მოვასხათ ცოტაოდენი ხორცის ნახარში ბულიონი, მშრალი რომ არ გამოვიდეს. შევაზავოთ მარილით და პილპილით (მარილი ცოტა მეტი უნდა მივცეთ, რადგან ბლინები უმარილო იქნება).

ბლინების მომზადება:

გავთქვიფოთ კვერცხები, დავასხათ 4 ჩ/ჭ წყალი, 3 ს/კ ზეთი, ჩავყაროთ ფქვილი და კარგად ავთქვიფოთ. გაცხელებულ ბლინების საცხობ ტაფაზე დავასხათ ბლინის მასა, ტაფის მოძრაობით გადავანაწილოთ მთელ ტაფის ძირზე. ბლინი ფურცელივით თხელი უნდა გამოვიდეს. უნდა ვადროვოთ, სანამ გამომცხვარ ბლინს ნაპირები თვითონ არ აეწევა, ხელის მოკიდება და მისი ტაფიდან გადმოცურება რომ შევძლოთ. სულ გამოვა დაახლოებით 40-50 ცალი ბლინი.

მოვათავსოთ 1 ს/კ ფარში ბლინზე, გადავუკეცოთ ნაპირები და გადავახვიოთ. მზა ბლინები შევწვათ ორივე მხრიდან ზეთიან ტაფაზე და ცხელი მივიტანოთ სუფრაზე.

ავტორი: ემილი.