წარმოგიდგენთ ყველაზე პატარა და მოუხერხებელი ბინის - ერთ ოთახიანი "ხრუშჩოვკის" დიზაინს.

ამ ბინის დიზაინისათვის ძირითადი მოთხოვნა იყო, რაც შეიძლება მარტივად და მინიმალურ ფასად გადაკეთებულიყო ბინა ისე, რომ კომფორტული და ლამაზი ყოფილიყო.

შეაფასეთ როგორ გაართვა თავი რთულ დავალებას ჩვენმა დიზაინერმა.

მანამდე კი მათთვის, ვისაც წარმოდგენა არა აქვს რას ნიშნავს "ხრუშოვკა", მოკლე მიმოხილვას გავაკეთებთ:

მიუხედავად დიდი მშენებლობებისა, ჩვენს ქალაქებში მრავლადაა შემორჩენილი ეგრეთწოდებული "ხრუშჩოვკის" ტიპის ბინები. ეს გახლავთ ნიკიტა ხრუშჩოვის პერიოდის 3-5 სართულიანი, პანელებიანი ან აგურის საყოფაცხოვრებო ბინების კომპლექსები, შექმნილი ვ.ლაგუტენკოს პროექტით, რომლებიც მასიურად შენდებოდა საბჭოთა კავშირში 1960-80-იან წლებში. ამ ტიპის სახლებში არ იყო ლიფტები, ჭერი ძირითადად 2,5 მ-ს არ აღემატებოდა, იყო ერთი ან ორ ოთახიანი ბინები. ადვილად დანგრევადი "ხრუშჩოვკების" სერია საბინაო პრობლემის დროებით გადასაწყვეტად იყო განკუთვნილი და მხოლოდ 25 წელზე გახლდათ გათვლილი. თუმცა, ამ ბინებში დღეს ბევრი ჩვენი თანამოქალაქე ცხოვრობს. 

ალბათ ძნელი არაა წარმოიდგინოთ მათი მდგომარეობა - არც ფული აქვთ უკეთეს ბინაში გადავიდნენ (წინააღმდეგ შემთხვევაში აქ არ იცხოვრებდნენ) და დისკომფორტსაც ვეღარ უძლებენ.

სწორედ მათ დასახმარებლად ვაქვეყნებთ ამ დიზაინს.

საუბარია სულ 32,50 კვ.მ ფართის ერთ ოთახიან ბინაზე.

დაუკვირდით გეგმას რეკონსტრუქციამდე და რეკომსტრუქციის შემდეგ. ძირითადი ცვილება ის გახლავთ, რომ ჰოლის ნაწილი, რომელიც სამზარეულოსკენ გადიოდა, ზალის ოთახსაა მიერთებული და სწორედ ამ ადგილასაა სამზარეულო გადმოტანილი, ხოლო სამზარეულოს გამოთავისუფლებულ ოთახში საძინებელია მოწყობილი, რომელსაც ზალის ოთახიდან აქვს შესასვლელი. ტიხრების დიდი ნაწილი ხელუხლებლადაა დატოვებული თუ არ ჩავთვლით კარების ჭრილებს, რომლებმაც ადგილი იცვალეს ბინაში.

ზალის ოთახი, როგორც უკვე გითხარით, გადიდებულია ჰოლის ხარჯზე, სადაც სამზარეულოა მოთავსებული. მასში შპალერიცა და ავეჯიც ღია ფერშია გადაწყვეტილი, რომ ბინა არ დაგვემძიმებინა. ვიზუალურად სივრცის შესაქმნელად კი ერთ კედელზე პანორამული ფოტოშპალერია გამოყენებული პეიზაჟის სახით.

ჰოლში განთავსებულია დიდი კარადა, სადაც სარეცხი მანქანაა ჩამონტაჟებული (ბინაში სხვაგან არსად იყო მისი ადგილი). მისი დამალვაც შეიძლება კარადის კარს მიღმა. ჩვენს დიზაინში კი ის ჩანს იმისათვის, რომ დაინახოთ სადაა მოთავსებული.

საძინებელი ოთახი, მართალია ძალიან პატარაა (სულ რაღაც 5,4 კვ.მ), მაგრამ აქ მშვენივრად მოთავსდა საკმაოდ მოზრდილი ტახტი (1,45მ/2,10მ) კედელში ჩამონტაჯებული ტევადი კარადა, 2 ცალი ტუმბო და ყველა აუცილებელი ნივთი. იმისათვის, რომ მოსაწყენი არ ყოფილიყო მისი სივიწროვის გამო და სივრცე ვიზუალურად გაგვეზარდა, აქაც გამოვიყენეთ ფოტო-შპალერი. ავეჯი ღია ფერისაა, რადგან ჩამუქება არ მოუხდებოდა ოთახს.

ვანის ოთახში ჩვენს ბაზარზე არსებული ყველაზე იაფფასიანი ინდური წარმოების კაფელია გამოყენებული (25სმ/37,5სმ ზომის). კუთხეში გამოყვანილია შემინული საშხაპე (90სმ/90სმ ზომის). მისგან დარჩენილი კუთხეები კი უნიტაზსა და ტევად, სათავსოებით აღჭურვილ ნიჟარას უჭირავს.

მთლიანობაში ბინა კომფორტული გამოვიდა. დიდი ყურადღება აქვს დათმობილი სათავსოებს, რომლებიც აუცილებელია იმისათვის, რომ მასში მცხოვრებმა ადამიანებმა დისკომფორტი არ იგრძნონ და ყველაფერს ჰქონდეს თავიანთი ადგილი მიჩენილი. 

ავტორი: ემილი.

2015-11-20.